Onwieze kearls
"Zee bunt toch neet good wies teggenswaordig. Zee gooit de roeten in, slaot de leu an de kop dat ze der van duuzelt, gooit van alles onderstebovven. Jao, wat neet al. Kieket 's aovends maor is op de televisie,'t is joo verschrikkelijk. Jao toch?"
Ik knikten maor is en ik dachte datter wal achteran zot kommen "Dat hadde wi'j vrogger is doon motten...ha, dan zol 'n ze uns..." Maor nea, hee begon luk te gröölen keek mi'j ton an en zea :"Wi'j wazzen trouwens vrogger gin bliksem beater!!" "Nea?", vroog ik. "Buj wiezer!!"
"Dat za'k ow vertellen. Bi'j Vonderman was vrogger is jongeleu's visite, maor daor heurden wi'j neet bi'j. Waorumme neet, dat wet ik neet ins mear. Maor wi'j vonden dat'n warselijk spil. Ne aovond met jongeleu, waor de mooiste meiden bi'j wazzen en waor wi'j neet bi'j heurden. Wi'j hadden ze af willen halen en nao hoes brengen en noo zol uns dat mis lopen. Dat was toch wat. Wi'j argerden uns scheal.
Den aovend wawwe met nog luk andern dee der neet bi'j heurden bi'j de Lindebeumer ton de visitengengers op Vonderman an Iepen. Zee zaggen uns en begonnen uns te jennen. Jah, i'j heurt der mooi neet bi'j, wat, daor hewwe geluk met dan hebbe wi'j in elk geval ne mooien aovend. Zukke gapers as i'j köwwe missen as tandpiene op zonnen visite...!! Wi'j schelden natuurlijk net zo hard terugge en ut was al 'n geschreeuw van waor buj mi'j. Endelijke ton de andern bi'j Vonderman nao binnen gingen genge wi'j maor bi'j Lindebeumers-Ziene nao binnen umme uns verdreef te verdrinken. Jah en wat veur verdreet! Poeh, daor wazzen heel wat snepskes neudig umdat verdreet te verzachten.
Zo zatte wi'j daor in de kökkene en goten ut eene glas nao't andere nao binnen. Maor ut verdreet verzachten? Ut verdreef worden hoo langer hoo groter. Nog un snepsken of wat en ton sloog der in inss eene met de voest op taofele....en schreeuwen: "Wat meent ze, wi'j zollen der neet bi'j heurn, dat zowwe ear laoten zeen! Wi'j gaot der gewoon hen!! Kom met! En met völle geschreeuw en lawaai, wi'j ok op Vondermcm an. Daor hadden ze alle deurn op slot en achter de waskamerdeure ston un stel jonk volk te schreeuwen: Ha ha, i'j heurt der fijn neet bi'j....i'j komt der fijn neet in!! Ha ha....En noo pot ver hier en gunter dat zöwwe ear laoten zeen, wi'j der neet in?? Dat zollen ze marken....Wi'j met z'n allen drukken veur de deure en bomsken en schreeuwen.
Maor van de andere kante schreeuwen ze net zo hard. Daor worden wi'j alleene maor onwiezer van!! Ton kwam der eene an raozen met ne groten rasterpaol umme daor met veur de deure te bomsken....maor in tied van niks gebroeken wi'j dat as stormram. Met uns vieven den paot ondern arm en dat op de deure an...boong...Hee gaf al luk met en nao un stötte of zesse kraken de deure al. Ton nog ne bomsk en daor kraken de deure midden deur en wi'j nao binnen hen maor daor wazzen ze ok neet lui....dee jongens hadden zich ne vleisspiele greppen en begonnen op uns los te houwen. De deerns begonnen te krieskene.
De olde Leida rearn as ne gek en ton ze uns earste achter de kaste dee bi'j de veurdeure ston dreven slooge wi'j natuurlijk terugge en in tied van niks lag de hele kaste op boek in de kökkene. Wi'j grepen ieders ne stoole en slogen der links en rechts met deur de kökkene. Ik genk met de kop ondern bozem staon zodat ze mi'j neet op de kop konnen slaon. En iedereene sloog en zwaaien in de rondte tot de staonde klokke ok nog umme rolden en in de kökkene veel. Earste nog teggen de taofele an en ton lag alles op de grond, 'n Olden Vonderman dee niks as schreeuwen: Der oet...der oet....Maor iedereene sloog maar deur tot inins de lampe met ne knal onder op de stenen vloere kwakten. In 'n duuster slooge wi'j nog rond maor probearn toch maor nao boeten te kommen.
Tonne wi'j boeten wazzen genge wi'j der gauw van deur en wi'j leten Vonderman mooi met 'n pröttel zitten. Wat 'n onwiezen spil....jao. dat was ut. 'n Onwiezen spil .....och, toch ne mooie tied....