Rondje
Un rondje deur de buurte neumen ut miene buurvrouwe. Zee vertellen dan dat ze vrogger alle bosschoppen dee ze doon moch hier in de buurte kon doon. Natuurlijk nao'n bakker den ok winkelwaare verkoch. Hee was misschien neet zo onwies gesorteerd as de huidige supermarkten maor hee hadde toch alles waj neudig. Ok zien brood was good. Stoeten, zwart brood, weggen en ok koekjes. Ok gin twaalf soorten maor dat von ok iedereene onneudig. Nee hadde dree soorten krintenkoekjes, groten, middelsoort en kleinen. De grootsten kosten per half pond ut meeste ofschoon der volle minder inzatten. De kleinsten ut goedkoopsten, maar daorzatten der ins zo völle in as bi'j de groten. Maor sommigen vonden ut luk dom umme op de kleinen te tracteerne. Nea, aj ow 'n naame hoge wollen hollen moj op groten tracteern. Tot plezear van'n bakker, natuurtijk.De buurvrouwe van'n bakker hadde un neaiwinkelken . Hee verkoch alles waj maor neudig kon hebben met 't breien en neaistern. Allerhande gaorn. Van neai- en handgaorn, borduurziede, spelden, naalden, vingerheu, kneupe en al dat andere grei. Zee hadde ne onveurstelbaoren veurraod an breiwolle. Daor waj zo'n uur kwiet.
Bi'j'n fietsenmaker den band op laoten pompen of un paar ni'je speken in laoten zetten. Atte lange wark zol hebben leep i'j efkes deur nao't postkantoor.
Postzeagels halen of geld storten. Wieters wazze der schoomaker bi'j en hadde ne drogisteri'je. Hee hadde allerhande tabletten, pojjers en drankjes. En 't gekke was ok nog, hee wis ok waor ut good veur was. Haj boekpiene? Dan moj dit is nemmen, ut mot der heel good veur wezzen. Of teggen, 't is maor hoo'j't zeggen wilt. Haj't in de rugge of in de lende? Moj hier met instrieken. Neet vaker as dree maol daags. Slaop i'j slech? Hier dizze pojjers. Neet te völle van nemmen, want dan woj gaarneet meer wakker. Keek i'j luk pierrötterig of veul i'j ow luk onzelig? Hier Pleegzusters bloedwijn. Binnen dree weake spring i'j wear ovver de heage. Dat zöj is zeen. Wieters hadde ok un lekker stuksken roekezeepe en natuurlijk koj der ok un flesken o de klonje kopen, veur Omma b.v.
I'j konnen der ok lööge fleskes wear vol laoten doon. Haj carboleum neudig ef koltear. Hee had ut!
De smid hadde boeten ut gewoone smidswark ok ne winkel. Dat dee de vrouwe. Dee verkoch ow pannen en köpkes en ander hoesholdelijk grei en natuurlijk hadde ok klein gereedschap as grepen, harken schoffelkes en hakken. Woj ne grote maskiene hebben dan moj wear bi'j den man wezzen. De verkoch ow ne grösmaskiene of ne heuiharke, plagen en eiden. Hee kon ow van alles levvern al hadde neet alles in veurraod. Hee bekeek met ow luk folders of genk met ow nao ne boer deete al zoiets verkoch hadde.
En dan kowwe ok nog nao'n kapper. Zaoterdagsmorgens zat ut vol olde kearls dee zich leten schearn. Dan genk scheern veur knippen. I'j konnen der hele daage terechte, tot 's aovends laate too. In de tied van 't heuien of roggemeaien hadde niks te doone. Dan zatte luk in'n hof te prutkene. Reang'n ut den andern dag dan genk in ins iedereene nao'n kapper. Veur hele oIde leu genke de leu langs en dan scheern hee ze. Tot op zondagmorgen too. Ok at der eene storvene was, dan kwamme. Dan schearn urm veur de leste keere. Ondertussen vertell'n hee dan watte allemaole met den gestorvene hadde met e'maakt.
Den kapper hadde ok ne winkel. Neet alleene scheermeskes en zeepe of köömkes maor hee verkoch ok feestartikelen. Van slingers tot gekleurd papeer of mooie platen met Hulde aan het Bruidspaar der op. En spöllegrei. Auteukes en poppen en ok wal kinderbeuke. Alle Kameleon's deewe noo nog in hoes heb komt van 'n kapper.
En dan 't café natuurlijk. Daor zatte wi'j neet zo vaake maor aj de fleske loog hadde halen wi'j bi'j hem wear ne volle. Ok veur de vrouwleu koj der alles kriegen aj is visite hadden.
Den kapper en de smid en 't café bunter nog. Maor unze postkantoor met drogisteri'je en schoomakeri'j bunt weg. Ok den bakker en 'n kruidenier en ut neaiwinkelken heb ut op e'gevvene. Nem i'j mi'j kwelke da'k daor soms met weemood an terugge denke??