Hood
Ik wet nog dat ze verkering met um kreeg. Ut was de ideale man veur Anna. Anna was ne gofke van ne'deerne hier oet de buurte. Zee leet zich wal is stiekum knuffelen deur de knech maor as huw'lijkspartner had' ze wat anders in de gedachten. Ut most der eene wezzen dee ear weghalen van de boerderi'je. Neet dat zee zich schamen veur de boerderi'je maor 'n betken mevrouw wezzen in 'n mooi hoes in 't darp leek ear toch ne beatere leavensvervulling. Ton kwam ze Gerhard teggen. Gééérhard zea ze altied. Dat von ze luk deftiger as dat domme Gerhard van uns.
Gééérhard was bookholder. Dat was wieters neet zo arg maor i'j konnen ut zo an um zeen. Alles was TE an hem. Ziene fietse was te degelijk. Eene met trommelremmen en völle chroom der an. Zienen hood ston te recht. Wi'j verdachten um der van dat hee ut waterpas der bi'j haalden at um op zat.'
Zien strik zat te lieke. Ziene manchetten keken op de juuste lengte oet de mouwen en zee zaten dichte met goldkleurige manchetkneupe. Kortom, hee gaf Anna juust dat wat ze geerne wol. Een mooi hoes in ne keurige straote in ne keurige buurt. Hoo ze um zo wiet e'reggene hadde begreep gin mense maor zee kreeg ok nog twee leuke dochters van um.
Hee genk elken morgen keurig op tied nao't kantoor op ziene degelijke fietse, met zienen degelijke hood, zien rechte strik én zien'n degelijken garbadnejas. Hee leafden altied eaven netkes. Ziene enigste oetspatting was ut secretariaat van ne humanitaire vereniging.
A'k vrogger mét peard en wagen deur darp veurden en ik kwam um téggen dan zeate ok altied netkes: Goeden morgen maor ik had de soms haoste onbedwingbaore neiging um u, met fietse en al veur't trottoir te drukken. Gelukkig kon'k mi'j altied nog inhollen.
Minstends 25 jaor hef ut vol e'holl'ne...altied op tied, altied dezelfde fietse, denzelfden garbadinejas en altied'n zelfden hood.
Ton kwamme ne keere op 't kantoor en iedereen zag wat an um. Moor wat? Inins zaggen de deerns wat der met um an de hand was. Mee had ne ni'jen hood!!
Asjeblieft.!
"Net zo eene as mien vader hef e'koch", zea eene van de meikes, "alleene vader ziene hood is wal veer maoten groter!"
De verleiding was natuurlijk te groot umme der neet an too tee gevven. Zee brach vaders hood met en verruilden um stiekum met 'n hood van Gééérhard. Zo ze 'm altied neumden. Hee worden mooi op dezelfde plaatse leg waor Gearhords hood 25 jaor e'leagene hadde. De initialen worden ok netkes veruild en ton Gerhard 's medddags noa hoes wol zetten hee'n hood nietsvermoedend op ut heufd. Maor den zakken um deepe ovver de aorne. Hee nam um weer af bekeek um van alle kanten en zetten um toch maor wear op de kop en fietsen der met nao hoes hen.
's Meddags bleek datte haoste z'n hele geliefde ochtendblad in den hood e'voold hadde, um um passend te maken. Natuurlijk verrruilden de meikes den hood wear en voolden ziene krante netkes in Gerhards eigen hood. Nao um wear van A tot Z bekekkene te hebben zetten urn toch maor wear op en fietsten nao hoes met den hood op ut puntjen van zien kuufken.
De hele weake fietsten hee dan wear met ne groten en dan wear met ne kleine hood nao hoes. Dan wear met ne krante in den groten hood en dan wear in den kleinen hood. Nao ne weake was de lol der natuurlijk af temeer umdat Gééérhard der wieters neet op reargeern. Veur de boetenwereld bleeve eaven röstig as altied.
Alleene noo, nao jaorn, verteld hee in een spraakzaam moment wal is an ziene intiemste vrende dat hee al is bezocht is deur ne wonderlukke en eigenaardige zeekte . Zien'kop worden elke keere groter en dan wear kleiner. Meestal wordt der neet op e reargeerd en beschouwd ziene oetlaoting as eene van ziene wonderlijke eigenaardigheden.