Tiedverkorting..
Korts kreeg ik ut verzeuk umme is twintig minuten te praoten ovver't vri'jen. Dat moch neet zo moeilijk wezzen, doch mi'j. Daor bunt kearls dee der hele daage ovver praoten könt.
't Vri'jen vind ik altied nog de mooiste tiedverkorting dee'n Leeven Heer uns e'gevvene hef .'n Biebel steet der vol van. 't Begunt al met Adam en Eva. Ik heb altied grote bewondering e'had veur Adam. Hoo hee zich e'red hef. Moj ow toch veurstellen, kearls, i'j loopt daor in 't paradies, prachtig wear, 't is der gewoon geweldig. En inins kump ow daor ne prachtige jonge meid temeute. En nog poedelnaakt ok. Daor moch Adam toch van opkieken / duch mi'j....h'j mot reaken, hee wist van gin toeten of blaozen. Hee had nooit gin sexuele veurlichting e'had, gin psycholoog ston der achter hem, gin socioloog, gin peadagoog en gin anderen oogen . Hoo moche der toch met an? Maor ondanks dat allemaole heffe zich good e'red! Dat is veur mij ut bewies dat dee hele vri'jeri'je der deur'n Leeven Heer gewoon bi'j in e'bokkene was. En net alleene bi'j Adam, maor ok bi'j ow, bi'j mij en bi'j uns allemaole!
Alleene he'k nooit begreppene waorumme dat dat altied stiekum mot gebeurn. 't Is toch eigenlijk de gewoonste zaak van de wereld en toch atter e'kust, e'knuffeld of wieters wat gebeurn zal dan trok iedereene zich trugge. Ut zol toch'n grof schandaal wezzen daj maor zo open en bloot, gewoon tussen de leu owwe vrouwe zollen gaon kussen of knuffelen. Ik heb nooit e'zeene dat mien vader mien mooder kussen. Nea, dat kon neet. Op de TV? Jah, maor dan is ut functioneel!. Ha ha, dat is toch neet ech...Nea, ut mot luk stiekum gebeurn.
Dörme he'k ut altied as 'n groot veurrecht en ok as'n veurdeel beschouwd dat ik op ut platteland bun geboren en getogen. Want daor was plas en geleagenheid zat! Jan Jans, i'j wet wal den bekenden schriever ovver plattelandsbouwkunst schrif in eene van ziene beuke; "De schuren en de bossen geven gelegenheid voor het liefdesspel waar'n stedeling gin notie van heeft." En van dee geleagenheid worden en wordt volop gebroek e'maakt.
Al hek wal ut geveul dat Amor toch lange neet meer dee kansen hef as vrogger. Ik heb nog'n mooi old gedicht waorin beschrevvene wordt dat de boernjonges de deerns op mot halen dee hen spinnen bunt e'wes. Zee krieget earste 'n paar borreltjes en dan mot zee ut spinnewiel dreagen en dan nao hoes. Maor't is duuster en de weg is zo modderig en dan zöch 't deernken al gauw hölpe bi'j den jonge. Hee mot ear maor good vaste hollen anders volt ze misschien nog. En tenslotte duiket ze met mekare de schoppe in, waor altied wal plas is umme te zitten of te liggen. Och jao, vrogger heb ze zich ok good e'red. Maor't mos wal stiekum gebeurn. In 't duustern.-.noh jah, daor was ut good fluustern.
Maor teggenwaordig? De jonges mot der heel wat wieter umme jagen umme contact te kriegen met de deerns. Op de boerderi'jen bunt ze neet meer. Vrogger wazzen der deerns zat, neet alleene de dochters maor un betken boer had ok nog ne meid. Soms ne grote en ne kleine meid. En geleidelijk an kwammen ze alle an de beurte. Maor noo? At ne boer nog ne goeien zönne in hoes hef dan wordt hee met'n trekker 'n es in e'stuurd. Mee krig nog'n bierpulleken vol koffie met want dat aardige deernken dat um vrogger koffie kwam brengen en waor hee ne zet met in de hegge kon zitten............ praoten.....dee bunter neet meer.
Nea, wat dat betreft buwwe der neet op veuroet e'gaone. Maor jah, de meesten redt zich wal, want 'n Leeven Heer hef ut der gewoon bi'j uns in e'bokkene.. Lauw um der dankbaar veur wezzen want' t is de mooiste tiedverkorting dee hee uns e'gevvene hef.