Commentator
Hoo meer a’k de krante laeze, hoo meer at ’t mi-j spit da’k gin commentator bun ewordene.
Ik zit hier maor luk te kletsen maor dat is toch neet ‘t echte commentatorwark. As commentator mo’j ovveral verstand van hebben en ik heb maor van weinig dinge echt verstand.
Ik stao der toch versteld van hoo dee kaerls in staot bunt umme ovveral weet van te hebben en ok onmiddellijk klaorstaot umme ‘t aere der van te zeggen. Of ‘t noo ovver politiek geet of ovver ’t voetballen; zee weet ovveral van.
Van ’t zommer ok met ’t voetballen. Ik was amper wakker den andern morgen of de krante ston weer vol verhalen hoo verkeerd ’t allemaole egaone was. Natuurlijk, den coach, den was joo veurtied al verkeerd, den wist joo nargens van. Zee hadden baeter mi-j an können stellen. Ik heb ok gin verstand van voetballen, maor ik hadde in elk geval ne twintig commentatoren rondumme mi-j ehaald en eerste mi-j is laoten vertellen hoo ik ‘t allemaole mos doon. Want naotied scheet i-j der natuurlijk niks met op. “Dat is ne koo in de konte kieken”, zae’we vrogger ok al.
Ok in de politiek geet ‘t prachtig. I-j snapt neet dat Bush gin bataljon Hollandse commentatoren bi-j zich held en aer vraoget hoo de wald regeert mot worden. Noh jah, Bush is natuurlijk luk völle vraoget. Maor elken börgemeister dee der toch verstandiger an umme zich te umringen met ‘n stel van dee leu dee ovveral verstand van heb. I-j snapt zonne kaerl ok neet, later zitte daor te vertellen dat ‘t eigenlek wal anders kan en misschien wal emot hadde.
Laot ze zich toch noo veurtied is good veur laoten lichten.